انا مش منجماتي

New Page 1
     

أنا مش منجماتي..!!

أنا مش منجماتي ولا باضرب الودع

لكن الكلام حياتي بارسم بيه البدع

أرسملك بنت شقرا

بيضا وعينيها خضرا

ورقيقه وزي عدرا شايله ولادها بحنان

بحنان من غير دلع

أنا مش منجماتي ولا باضرب الودع


المعني عندي لون

له نغمه بألف تون

والأسم معاني حلوه

فيه ناس بيقولوا دنيا وناس بيقولوا كون

والغلطه تساوي جون

في شغلي جد جدا ..ماباحبش اللوع

أنا مش منجماتي ولا باضرب الودع


ممكن تقولي عاشق

ف القلب السهم راشق

من رد الفعل واثق

كسول لكني حاذق وتقيل لكن جدع

أنا مش منجماتي ولا باضرب الودع


لما اعشق مش باغييييير

وحماسي مالوش نظييييير

وكلامي ياناس خطيييير

لو فيه قلوب بتفهم وودان ليها ف السمع

أنا مش منجماتي ولا باضرب الودع


متفائل عندي بكره أحسن من اللي فات

ومؤمن بالقدّر ليّا معاه ذكريات

وباصاحب العوام ..الفقرا والذوات

مرموق وعندي هيبه في أي مجتمع

أنا مش منجماتي ولا باضرب الودع


دي مش صفاتي انــــا

دي صفاتك شفتها

من كلمه على "الطنيطر"

من "قلشه" سمعتها

جايز أكون بابالغ

وتكوني واحده تانيه غير اللي عرفتها

أتمنى تكوني إنتي

صفاتك دي يابنتي جواهر تتجمع

أنا مش منجماتي ولا باضرب الودع

لكن الكلام حياتي بارسم بيه البدع

أرسملك بنت شقرا

بيضا وعينيها خضرا

ورقيقه وزي عدرا شايله ولادها بحنان

بحنان من غير دلع

أنا مش منجماتي ولا باضرب الودع

 

إهداء من

إميل مرقس

إلى إبنتي چيهان 13/2 كل سنه وانتي طيبه



     

=''>

آخر المواضيع